GOD BLESS AMERICA: AN INTELLECTUAL OVERVIEW

September 26, 2012 by zombem 14 Comments

Film ini tuh semacem versi sinema dari skit-nye Charles Bronson. Charles Bronson the band. Iye, ada band namanye “Charles Bronson”, soalnye kalo ada band yg namanye “Bon Jovi”, “Winger” ama “The Moffats”, kenape ngga boleh ada yg namanye Charles Bronson?

Ok, pertama-tama gue pengen minta maaf pada sapepun yg ngerasa gue perlu minta maaf atas kegagalan buat ngisi blog ini secara rutin. Bukannye gue ngga pengen lagi berbagi kearifan ama kalian, para pembaca nan budiman sekalian, cuman kebetulan belakangan gue punya masalah manajemen waktu cukup rumit berhubung, saat ini, keidupan gue lagi disibukin ama dua hal penting:

Pertama: ada beberapa proyek, baik finansial maupun personal, yg maksa gue nangkring depan Photoshop 12 jam sehari.

Kedua: YouTube punya sejumlah video konser Rihanna pake busana yg selalu gue bayangin doi pake pagi-pagi abis nginep di kosan gue.

Perhatian promotor: kalo kalian emang pengen, bener-bener, ngedatengin Rihanna. Lakuin itu sekarang mumpung doski lagi ngga punya celana

Kedua hal tersebut, ditambah sesi luncur rutin tiap sore, udah cukup buat bikin gue ngga punya waktu bakal ngapa-ngapain lagi, termasuk nonton film, dan semua peresensi film tau kalo ngeresensi sesuatu tuh luar biasa sulit ketika ngga ada ape-ape guna diresensi. Tetapiii, berhubung belakangan ini pembaca-pembaca gue nan budiman udah dengan baik hati ngadiahin effort gue selama ini pake sejumlah besar hits & kiriman foto-foto bugil diri mereka, gue ngerasa harus ngeluangin sedikit waktu dari jadwal guna ngasih kalian sesuatu buat dibaca, gue asumsiin pake hape canggih pas ngebunuh waktu sambil buang aer besar di toilet gedung tempatnye elo-elo semua berkegiatan.

Film ini udah lama keluar DVD-nye, jadi gue yakin lo udah pada nonton. Sebenernye judul ini dikategoriinnye ke genre komedi sih, tapi di dalemnye ada banyak adegan orang nembak orang laen jadi kayanye sah gue taro di blog ini. Sutradaranye namanye Bobcat Goldthwait, yg berdasarkan riset gue beberape hari lalu highlight resumenye adalah ikutan maen di Police Academy. Gue ngga tau yg mane soalnye gue ngga inget sapepun di Police Academy selaen Michael Winslow, itu pun soalnye die juga maen di Spaceballs. Keberadaan alumnus Police Academy di kursi kecil yg –selalu gue bayangin- dikelilingin umbrella girls kayanye udah ngegusur keraguan sapepun kalo ini tuh emang film komedi, soalnye kalo lo punya nama macem “Bobcat Goldthwait”, kesempatan berkarier di mane lagi yg lo punya selaen komedi?

God Bless America ngenalin kite pada Frank (Joel Murray), makhluk dengan peruntungan paling buruk di luar halaman komik Donal Bebek. Die udah cerai, tinggal sendiri di apartemen sebelahan ama pasangan annoying serta balita dengan pita suara lebih kuat daripade Bianca Castafiore. Frank praktis ngga punya keidupan, ngga punya temen, ngga punya masa depan, serta ngga punya kegiatan selaen mindah-mindahin saluran TV tiap 3 menit sekali semaleman. Ngomongin TV, die benci banget gituan, die benci reality show berisi orang-orang yg beken tanpa alesan apepun selaen karena mereka ada di TV, ama acara bakat yg ngga se-iota pun mengandung unsur bakat di dalemnye. Alesan kenape die tetep setia nontoninnye tu soalnye…eh…jujur gue ngga tau kenape die tetep nontoninnye. Masa sih lo ngga punya DVD player Frank? Ape PS3? PS2? Profil situs kencan online buat dicek?

Serius, Katy Perry punya 31 cara buat nutupin boobs doi & lo ngga bisa nemu satu alternatif pun dari ngeliatin ini?

Ok, kite asumsiin aje die nonton soalnye terlalu capek ngapa-ngapain abis kerja seharian, meski sejujurnye gue kenal orang-orang yg make alesan persis sama ke istrinye guna ngelakuin hal lebih konstruktif kaya ngebunuhin naga di Skyrim. Jadi, guna ngenafkahin dirinye, Frank adalah karyawan pada tempat di mane orang-orangnye pada ngelakuin hal yg umumnye dilakuin orang-orang di kantor; ngegosip, ngebahas acara TV semalem, acara radio tertentu, dst, dst, praktis apepun selaen kerja. Frank ngga suka ini. Bukan karena die sangat menikmati kerja, tapi karena temen-temennye ngga ada yg terlibat perbincangan personal antara satu sama laen. Kenape semua orang cuman ngobrolin hal-hal banal bikin Frank emosi, kenape die buang-buang waktu merhatiin orang-orang ngobrolin ape bikin gue bingung. Serius Frank, masih ada kok cara-cara lebih ngga putus asa buat nyiksa diri sendiri.

Lo bisa aje beli earphone trus dengerin Adele

Petualangan sedih Frank berlanjut dengan fakta bahwa anaknye sendiri ngga mau dateng buat ngunjungin die, yg sebenernye bisa dimengerti karena “nonton reality show bareng sambil dengerin ayah mengeluh tanpa henti soal itu” emang ngga kedengeran kaya cara menarik guna ngabisin waktu. Untuk kesekian kalinye, Joel Murray ngasih ekspresi “sad panda” terbaikye ke kamera sambil…nontonin reality show dungu. Beneran dah, ada ape sih antara Frank ama reality show? Ape die punya obsesi rahasia tertentu pada penduduk negara Kardashia? Sumpah gue ngga pernah liat pria dewasa ngonsumsi acara ginian serutin Frank, dan die ngakunye sih benci ama itu. Ape lo juga punya akun Facebook Frank? Ape lo punya akun palsu sekedar buat nge-stalk orang-orang yg lo ngakunye benci di situ? Sungguh sedih idup yg lo jalanin Frank. Kayanye sutradara Bobcat Goldthwait juga nyadar karakter utamanye rada terlalu aneh buat mancing empati penonton, jadi die ngambil jalan pintas simpati terpercaya dengan secara mendadak bikin die jadi pengidap sebuah penyakit otak mematikan.

“Pak, otak bapak ngga ada isinya kecuali dua titik berisi pikiran kotor ini, yg berarti bapak adalah pria sehat pada umumnye”

Ngerasa ngga punya alesan idup lagi, Frank (gue suka banget nyebut nama itu) ngambil keputusan untuk ngakhirin idupnye sambil…tetep nonton reality show (sigh). Tentunye, bahkan seorang pengidap penyakit-otak-mematikan pun masih punya akal sehat buat ngga ngebiarin acara tolol gitu jadi pemandangan terakhirnye. Sebelon mati, Frank ngerasa kalo die pengen nembak mati seorang celebretard dulu soalnye, ya, sape yg ngga kan? Pas beraksi itu pulalah die ke-gep seorang gadis bernama Roxy (Tara Lynn Barr) yg ngikutin die pulang karena di kota itu gadis SMA punya skill melacak lebih kompeten daripade seluruh armada aparat kepolisian. Roxy juga punya bakat jadi pembicara motivasional, berhubung doi berhasil ngeyakinin Frank kalo ngebunuh orang laen tu bakalan jauh lebih produktif bagi masyarakat daripade bunuh diri. Maka mereka pun ngelakuin perjalanan bareng & lebih saling mengenali satu sama laen kaya yg dilakuin sepasang lawan jenis di buku-bukunye Nicholas Sparks, cuman di sini cowonye ngga muda ataupun ganteng sementara cewenye kebetulan psikopat.

Di film Amrik, seorang gadis terkarakterisasi sebagai “psikopat” jika doski sama sekali ngga ngerti fesyen

Begitu semua bagian “nonton reality show”-nye berenti & “nembakin orang secara acak”-nye dimulai, di situlah God Bless America nemuin bentuknye sebagai tontonan menyenangkan. Sekarang gue bisa nangkep ceritanye, bikin segala hol tolol sebelonnye (juga semua sesudahnye) jadi masuk akal. Tadinye, gue pikir GBA bakal sekedar jadi masturbasi ideologi sang sutradara doang, sekarang, gue bisa ngeliatnye sebagai komedi berdasarkan ideologi bersangkutan. Bedanye jelas; yg pertama ngga lebih dari pandangan bener-salah berdasarkan versi sang sutradara, sementara yg kedua ngambil angle lebih beragam dari ide serupa. Frank ama Roxy punya alesan valid ngebenci ape yg mereka benci, tapi keduanye tetep ngga bisa dibilang orang bener. Ambil contoh Frank: seorang pria dewasa dengan krisis jatidiri sedemikian akut sampe bisa dimanipulasi ama gadis ABG. Jujur aje, die pathetic & satu-satunye alesan kenape die ngelakuin semua ini adalah soalnye udah ngga ada ape-ape lagi di idupnye. Kalo misalnye cerita ini beneran, itu tragedi. Berhubung ini komedi, itu sama lucunye ama ngeliat anak emo ngejerit-jerit putus asa di panggung, gue asumsiin ngewakilin jeritan frustasi kemaluan yg tertindas oleh opresi jins merecet mereka.

Bro, gue cukup yakin ada alesannye kenape gituan disebut “women’s jeans”

Roxy sendiri, meski ngakunye ngga suka ama rekan seumurnye, sebenernye sama ngga bergunanye ama semua orang yg doi benci. Doski ABG pada stadium di mane doi ngerasa dirinye tuh istimewa, unik, dan layak diperhatiin. Tentunye, di kalangan anak umur segitu, fenomena itu sama sekali ngga istimewa, unik, ataupun layak diperhatiin. Jelas ada kecacatan kepribadian pada kedua tokoh utama kite ini; dua-duanye idiot, tapi mereka idiot yg menarik. Plus, mereka secara spesifik ngincer jenis idiot laen, dan ngeliatin idiot bertempur lawan idiot laen adalah satu-satunye alesan kenape gue ngebuka forum diskusi di internet. Itu lucu. Ngeliat orang ditembak gara-gara bertingkah kaya asshole di bioskop? Lucu! Ngeliat celebretard ditembak dalem mobil bokapnye? Lucu! Jangan pura-pura kalo lo ngga pernah punya pikiran gitu lah. Toh, pikiran kaya gitu praktis harmless berhubung gue yakin ngga ada satupun diantara kite bakalan bener-bener ngelakuinnye, kenape? karena kite ngga punya ketidakseimbangan mental. Nah, Frank jelas punya gangguan tertentu, itu makanye aksinye jadi masuk akal. Sementara Roxy? Tingkahnye bisa dihindarin kalo ada figur dewasa yg lebih teges dalem soal ngelarangnye buat jadi prick. Sayangnye, Frank ngga tergolong orang dewasa bertanggung jawab, sesuatu yg die buktiin dengan inisiatifnye ngajarin Roxy cara make senjata api. Harap diinget kalo doski tuh ababil pada umumnye, tipe-tipe yg bisa ngebunuh kewarasan orang laen pake penggunaan akronim serta emotikan secara absurd. Ngasih senjata api ke anggota demografik ini tuh praktis sama berbahayanye bagi lingkungan kaya nyuplai seekor simpanse juggling sirkus pake sejumlah granat tangan.

Untungnye, bidikan doski adalah satu-satunye hal yg lebih buruk daripade pilihan busana doi

Sebagian orang ngritik God Bless America sebagai film munafik. Gue ngga akan ngomong tuduhan itu salah, malah sebenernye gue setuju, cuman, buat gue kemunafikan tersebut jusrtu bikin film ini jadi makin lucu. Biarpun Bobcat Goldthwait mungkin ngedukung ideologi tertentu, film ini tetep cuman film, hiburan, dan ke-ngga sempurna-an karakternye adalah bagian darinye. Gue rasa bagus tokoh dalem film punya kekurangan soalnye kalo ginian ngepresentasiin dirinye sebagai 100% kebenaran sejati, maka namanye tuh “propaganda realisme-sosialis”. Pesen dalem sebuah film tuh ada buat dicerna, bukan ditelen mentah-mentah. Ini penting soalnye kalo seseorang percaya sepenuhnye ama satu produk kultur-pop, idupnye bakalan berantakan. Misalnye lo percaya ama film remaja 80-an, lo bakal ngira semua anak SMA tu pasti punya ban item di ilmu beladiri tertentu & perbedaan pendapat rapat OSIS selalu diselesaiin dengan turnamen kumite. Misalnye lo percaya Katy Perry lo bakal ngira kalo bayi tuh adalah kembang api, dan misalnye lo percaya TV maka lo bakal ngira punya hobi karaoke bikin lo secara otomatis terkualifikasi buat jadi idola Indonesia.

Percaya James Cameron, maka cinta berarti “ngga mau minggir dikit supaya orang laen ngga perlu kena paru-paru basah”

Gue ngerti konsep-konsep kaya gitu emang bagus buat tontonan, tapi di keidupan nyata, tempat di mane ngga segalanye perlu didramatisir, selalu ada opsi lebih baik bagi pihak yg terlibat. Dalem kasus contoh gambar di atas, gimane caranye ngungkapin cinta sejati tanpa harus secara tragis meninggal karena hipotermia.

Misalnye cewe yg lo pacarin ngga ngambil salah satu opsi di atas, putusin doi secepatnye!

Kembali ke plot, setelah terjadi drama antar karakter yg gue ngga inget soal apa, Frank mutusin beli senapan AK-47 buat ngebajak studio TV pada penayangan langsung acara yg die benci. Jadi, die ceritanye percaya banget kalo acara itu udah ngelakuin pelanggaran etika moral tertentu terhadap kemanusiaan &, karenanye, layak ditutup secara paksa dengan kekuatan senjata. Gue ngga yakin, tapi kayanye Google tuh di-banned di Pakistan untuk alesan serupa. Frank ngerasa kalo die bisa ngebangkitin kesadaran masyarakat dengan ngegunain pidato serta senjata api. Gue tau sejumlah diktator Amerika Selatan pernah berhasil ngambil alih kepempinan pake rencana yg persis sama, tapi gue cukup yakin mereka sih punya senjata lebih banyak. Jangan salah, die bawa beraneka ragam senjata, cuman ngga mungkin cukup aje buat ngeruntuhin sebuah peradaban. Die juga make kemeja paling buruk di dunia, gue duga sebagai proteksi soalnye gituan tuh sedemikian ngga menarik sampe peluru tajem pun ngga akan sudi nyentuhnye. Frank kayanye terinspirasi superhero buku komik tanpa pernah baca bagian soal “kekuatan super”-nye, lalu ngasumsiin kalo make busana dengan kombinasi warna-warna mengerikan adalah alesan kenape mereka semua kebal kematian. Intinye, Frank bener-bener ngga ngerti konsep dari artileri.

Nampaknye, die juga yakin cara ngebidik terbaik adalah dengan nongolin kepala ngelawan angin keluar jendela mobil ngebut

Toh, lo ngga bisa nyalahin Frank. Die cuman seorang pria penuh ide-ide yg ngga tau cara positif guna nyalurinnye. Kekurangannye itu lah yg bikin karakternye menarik, lagian, banyak film ngebuktiin kalo kekurangan bisa dijadiin mestika ampuh guna nyelametin dunia kok; Bruce Campbell ngebasmi Deadites pake dagunye, Rihanna ngebom alien pake jidatnye, dan nanti, pasca zombie-apocalypse, gue bakal seorang diri ngerepopulasi umat manusia pake genital gue. Rencana Frank (harep dicatet kalo gue make istilah “rencana” tadi dengan sangat longgar) adalah bikin statement secara live soal gimane orang harus berenti ngonsumsi tontonan ngga bermutu di TV sementara nyandera satu studio, yg jelas adalah cara paling pasti buat bikin orang tetep nontonin TV. Terakhir gue nyaksiin niat mulia dieksekusi pake cara sedemikian buruk adalah pas developer game-game Resident Evil nyalahpahamin antara “zombie-apocalypse” ama belanja di Carrefour; dengan nyuruh lo ngambilin sejumlah barang-barang ngga guna diantara makhluk-makhluk yg terhuyung-huyung tanpa arah.

“America has become a cruel & vicious place. We take the weakest in our society, hold ’em up to be ridiculed, laughed at for entertainment. Yadda, yadda. Also, hi mom!”

Bagi sebuah film yg dimulai gara-gara tokoh utamanye ngga tau caranye matiin TV, God Bless America ternyata sukses jadi film komedi lucu. Ada sejumlah referensi pada kultur-pop, terutama reality show yg gue ngga tau apaan berhubung gue ngga cukup gila buat nonton gituan. Juga komentar-komentar sinis pada keadaan dunia modern yg, ngga tau disengaja ape kaga, berhasil keliatan menggelikan. Itu yg gue suka liat dalem hiburan, gue ngga peduli apaan yg pengen disampein seorang sineas selama hasilnye ngehibur. Tentunye ada judul-judul yg ngandung pesen-pesen spesifik tertentu, tapi itu cuman jadi masalah kalo pesennye malah jadi lebih penting daripade filmnye sendiri. Agenda personal sineas tuh lebih ngebunuh hiburan daripade pembajakan, karena kebanyakan audiens bukanlah ahli matematika & ngga perlu berurusan ama angka-angka imajiner. Bobcat Goldthwait sama sekali ngga ngumpetin pandangannye pada keadaan dunia masa kini, toh, die bisa ngevisualisasiin itu tanpa self-righteousness militan berlebih. God Bless America emang statement pribadinye, tapi orang laen ngga perlu setuju, atau ngga perlu setuju 100% ama pandangannye. Gue ngga yakin gue setuju, cuman gue jelas bisa nikmatinnye.

Kalo seseorang bikin sesuatu di bidang “entertainment”, die harus nyadar bahwa tujuan utama produknye adalah bikin orang laen ke-entertain. Tentu setiap orang punya kontrol kreatif masing-masing, tapi itu mestinye dimaksimalin demi kepuasan penonton, karena, sebagai audiens, kite bakalan selalu ngapresiasi entertainer yg sepenuhnye berkomitmen buat mastiin kite tuh seneng. Itu kenape God Bless America enak ditonton; soalnye Bobcat Goldthwait bikin film komedi yg ngga ragu-ragu dalem soal keliatan kaya komedi. Itu juga kenape pro-wrestler ngancurin badannye sendiri di ring ama kenape Rihanna manggung ngga pake celana: soalnye buat mereka audiens layak dapet hiburan terbaik yg bisa mereka kasih, dan toh buktinye itu berhasil. Itu semua emang luar biasa ngehibur…terutama ngeliat Rihanna joget-joget di panggung tanpa celana.