INAFFF’11; THE RAID: AN INTELLECTUAL OVERVIEW

November 24, 2011 by zombem 59 Comments

Gareth Evans ngumpulin semua eksyen paling badass dari seluruh serial Die Hard dalem satu film, naro Chow Yun Fat ngegantiin Bruce Willis, dan makenye buat ngebunuh Chuck Norris.

.

Pertama-tama, gue pengen ngomong kalo gue ngga punya “nasionalisme” dalem soal nonton film.

Gue ngga pernah peduli ama negara asal sebuah film; mau Indonesia, Indochina, Timbuktu ape Republik Barbados, kalo emang bagus gue bakal bilang bagus…kalo ngga…ya ngga.

Dengan itu dijelasin, alesan kenape gue semangat nonton The Raid di INAFFF kemaren bukan soalnye itu film Indonesia (yg disutradarain ama orang Wales), tapi karena –dari trailernye- itu keliatan kaya satu film eksyen yg luar biasa badass. Sebenernye gue jauh lebih suka pas ini masih dijudulin “Serbuan Maut” sih, ngga tau kenape perasaan itu lebih cocok ama premisnye. Cuman dikarenakan film ini ternyata dapet rilis internasional, maka Hollywood -yg punya kebiasaan annoying ngerusak segalanye yg mereka impor- ngerasa kalo “The Raid” tuh lebih marketable bagi pasar bebas. Meski itu sebenernye masih bisa ditolerir (gue ngga akan protes kalo film ini bisa sukses secara global), satu hal yg sulit dimengerti adalah kenape pihak-pihak tertentu kudu ngebayar Mike Shinoda demi ngeganti score-nye kaya seakan-akan di dunia ini masih ada orang yg peduli ama Linkin’ Park.

Jujur aje, susah buat nulis soal The Raid tanpa harus ngasih tau momen-momen yg bakalan ngerusak pengalaman orang laen pas nontonnye nanti. Film ini punya premis ama cerita yg bahkan lebih sederhana dari plot game ding-dong beat-em-up 80-an dulu: satu regu SWAT (atau ekuivalensi Indonesia dari SWAT) nerobos masuk ke rumah susun 30 lantai dalem rangka nangkep gembong narkotik lokal (diperanin secara fantastis ama Ray Sahetapy), masalahnye, rumah susun itu ternyata juga semacem suaka-margasatwa bagi kriminal-kriminal berbahaya (yg keliatannye semua pernah jadi petarung UFC). Begitu kelompok protagonis kite ke-gep di tengah aksinye pada lantai 7, mereka kudu nembakin semua penjahat yg nongol di lorong-lorong kumuh, lantai demi lantai, sampe nyampe ke pusat komando-strategi gembong narkotik tersebut di lantai 15. Jadi, secara sederhananye plot dari The Raid tuh bisa dirangkum kaya gini:

The twist? Mereka keabisan peluru di tengah jalan & kudu ngelanjutin pertempuran dengan ngandelin skill Senopati Pamungkas yg mereka punya. Ngebunuhin gelombang penjahat yg dateng silih berganti ngga ada abisnye kaya tentara Somalia nyerang Rangers di Black Hawk Down dengan manfaatin senjata tajem, benda tumpul, ataupun tangan kosong demi nyelesaiin misi yg udah berubah dari –tadinye- berusaha nangkep gembong narkotik jadi sekedar bertahan idup aje. Soalnye kite semua tau kalo, pada saat ini, cuman ada satu hal yg bisa lebih penting daripade bertahan idup.

Tergambar di atas: alasan valid untuk idup

Tentunye, gampang buat ngritik film ini (ataupun film eksyen manepun) dari sudut keminiman ceritanye. Faktanye adalah, meski praktis ngga punya narasi di dalemnye, ngga akan ada yg peduli soalnye kite terlalu sibuk nikmatin semua mindless-violence yg terjadi secara konstan kaya dentuman treble di sebuah remix Bassnectar. Bagi mereka yg suka filmnye diisi ama darah tumpah ama tulang patah, The Raid punya banyak kekerasan-vulgar-eksplisit buat bikin kalian ejakulasi di korsi bioskop; tembak-tembakannye sama intens kaya seri Die Hard manepun, baku hantem lorong sempitnye bikin Oldboy keliatan kaya episode Saint Seiya, dan orang-orang di layar tewas dengan cara-cara kreatif yg bikin audiens INAFFF sorak-sorak meriah pas ngeliatnye, kaya seakan-akan kite baru aje nyaksiin Van Damme ama Chong Li manggung bawain sebuah lagu yg 100% diaransemen dari suara tereakan orang-orang yg tengkoraknye baru aje mereka ancurin pake tangan kosong.

Kalo ngga salah, genre semacem ini disebut dengan istilah “power violence”

Terakhir pas nge-review Immortals, gue ngomong kalo Hollywood udah punya pakem baru estetika film eksyen modern. Satu yg penuh dominasi CG, wire-fu, ama pose-pose slow-motion heroik. Nah, persetan ama gituan soalnye The Raid itu 100% film eksyen old-school!  Satu yg nunjukin kalo nusuk leher seseorang trus matahin leher orang laen tuh cuman perlu terjadi dalem selisih waktu sekedipan mata & semua orang di dalemnye keliatan kalo mereka bener-bener nonjok ama ngelempar sparring-partnernye ke tembok sekeras mungkin. Ngasilin adegan-adegan laga di mane ape yg terjadi emang keliatan kaya itu bener-bener menyakitkan. Kaya sebuah video-game yg awesome, lo ngga akan peduli ama plot ape cerita soalnye ngeliat orang-orang ini berusaha saling bunuh di layar tu jauh lebih menyenangkan. Ceritanye seperlunye, disampein pake dialog singkat & padat, mungkin soalnye sutradara Gareth Evans tau kalo stage “terpaksa berdialog dengan semua karakter yg lo temuin buat tau lo harus pergi kemane” adalah level paling ngebosenin dalem sebuah game di mane ngebunuhin musuh secara membabi-buta adalah alesan utama kenape orang-orang maeninnye, menyadari sepenuhnye kalo ngelakuin hal semacem itu sebenernye bisa nyelesaiin 90% dari problem kite di dunia nyata.

Meeting ama klien bakal 10x lebih efektif kalo kite ngelakuinnye sambil nodongin senjata ke satu sama lain

Coba inget-inget bagian pertempuran paling epik dari sebuah film eksyen, biasanye di 20 menit terakhir kaya adegan restorannye The Protector. Sekarang bayangin misalnye itu terjadi secara konstan sepanjang full 90 menit, nah, The Raid tuh kaya gitu. Film ini bukan sekedar violent aje, tapi non-stop violence. Kunci kesuksesan utamanye adalah keberhasilannye terus-terusan ngasih penonton sekuen eksyen yg lebih dashyat dari apaan yg baru terjadi 5 menit sebelonnye. Waktu lo pikir temponye bakalan turun begitu protagonis kite keabisan peluru, semua yg terlibat di dalemnye tau-tau mulai matahin tangan ama nusukin leher pada sejumlah pertarungan tangan kosong yg keliatan kaya battle royale MMA. Secara resminye sih ilmu beladiri yg dipraktekin di sini tu pencak silat, toh ternyata itu ngelibatin ngebenturin pala orang ke tembok & lantai sekeras mungkin, RKO ke atas pecahan kayu sampe running-swinging-neckbreaker dengan eksekusi lebih sempurna dari yg dilakuin Michael McGillicutty. Ini ngeyakinin gue bahwa  “pencak silat” tuh kalo diliat-liat sebenernye punya filosofi “lakuin apepun selama itu nyakitin orang laen” ala semua teknik bertarung universal laennye, yg juga adalah tujuan kedua dari buat apa “ilmu beladiri” tuh diciptain setelah “ngebunuh musuh dengan cara paling menyakitkan yg bisa dibayangin”.

Peringatan: ngelakuin ini bisa secara tragis berakhir  dengan mayat kalian ditemuin dalem keadaan saling berpelukan erat di muka umum

Tentunye, film eksyen tuh ngga segalanye cuman soal mindless-violence semata…Ok, ok, segalanye emang cuman soal mindless-violence semata sih sebenernye, tapi masalah utama dari judul-judul genre ginian, satu yg kayanye ngga pernah berubah dari jaman Charles Bronson, Sly Stallone, Steven Seagal, Arnold Swagger, Jet Li, sampe Jason Statham, adalah kecenderungan pion-pion antagonisnye untuk keliatan luar biasa bodoh; ngga punya kemampuan nembak lurus serta suka berdiri-berdiri di tempat nungguin giliran buat ditonjok kalo lagi nyerang rame-rame. Ini contoh kebiasaan-kebiasaan yg bikin kebanyakan antagonis film eksyen umumnye keliatan sama ngga berbahayanye ama foot soldiers-nye Shredder di Teenage Mutant Ninja Turtles, berakting sesuai buku paduan yg dibagiin ke stuntman-stuntman dalem semua produksi yg dibintangin Dolph Lundgren.

 Lo ngga ngeliat yg gitu di The Raid.

Di sini, bahkan penjahat-penjahat ikan terinye pun tau caranye berantem, dan mereka cukup tangguh buat ngga pingsan dengan sekali pukul kaya Michael Spinks pas ngelawan Mike Tyson. Ini bikin jagoannye; Rama (Iko Uwais) harus bener-bener usaha guna bisa nge-KO mereka, dan itu yg kite semua pengen liat kan? Ngga tau kalo orang laen sih gimane, tapi secara pribadi, gue ngga pengen action-hero gue bertingkah kaya superhero; ngelempar musuhnye ngelawan hukum gravitasi pake effort minimal ape bikin orang lumpuh cukup dengan ngegerakin tangan sambil ngunyah permen karet kaya Superstar Rajini. Ngga, itu sama sekali ngga cool. John Cena ngelakuin hal-hal kaya gitu, sekarang gue tanya, ape John Cena cool? Seorang jagoan emang ngga perlu manusiawi, sifat ”manusiawi” pada karakter film eksyen itu hal paling ngga berguna dalem kultur-pop sejak Doom ngasih tombol “peaceful negotiation”, tapi seengganye coba sih bikin die keliatan kaya die harus berjuang buat ngalahin musuhnye. Itu cara paling gampang ngasih emosi pada sebuah film eksyen; seorang action-hero yg kerja keras ngalahin musuh-musuhnye. Di dalem rumah susun ekuvalensi rumah jebakan Saw 2 ini; protagonis kite harus mati-matian ngelawan gelombang serbuan musuhnye dengan cara apepun yg mereka bisa, sambil nerima lebih banyak pukulan dari yg diterima Steven Seagal di sepanjang kariernye. Hal sesederhana ngeliat mereka susah payah tu udah lebih dari cukup untuk bikin kite jadi punya alesan ber-empati, soalnye polisi-polisi ini keliatan usaha.

Sementara Charlize Theron cukup nunjukin cleavage doi & tau-tau semua orang di sekitarnye roboh tanpa alesan jelas

Manusia emang ngelakuin itu kok di dunia nyata, mereka usaha. Gimane lo mau awesome kalo lo ngga usaha? Bahkan kite pun kudu usaha ngedeketin lawan pada jarak yg pas, trus neken depan, bawah, depan, Y secara sempurna kalo pengen nyabut torso orang dari badannye… dan itu cuman sekedar buat bisa nyebut die “fag” via Xbox chat.

Masalah antagonisnye sendiri, lo ngga akan nemuin kumpulan penyamun lebih solid dari yg ada dalem rumah susun ini. Performa aktor senior Ray Sahetapy sebagai gembong penjahat lokal ngebuktiin kalo seorang bos kriminal ngga perlu jas KW bermerk ama aksen bule palsu Rudi Wowor supaya keliatan jahat. Tapi meski die emang target operasi nomer 1 dari serbuan maut ini, semua yg nonton bakalan sepakat kalo badass utamanye tuh sebenernye tangan kanannye yg dipanggil Mad Dog (Yayan Ruhian). Asli, cukup pake sebuah line, orang ini ngejelma dari orang yg keliatan ngga terlalu berpengaruh buat jadi orang paling berbahaya dari seluruh anggota cast (poin ekstra soalnye die keliatan mirip banget ama temen gue di dunia nyata). Kalo aje misalnye review ini ternyata bikin Yayan Ruhian marah, gue yakin orang itu punya 850 cara untuk ngebunuh gue sekarang juga pake tangan kosongnye. Satu lagi yg harus disebut sekaligus favorit pribadi gue adalah geng mutiara timur yg terkredit sebagai “The Machete Gang”, sialnye, gue udah ngejelajah internet tanpa nemuin hasil memuaskan soal jatidiri ataupun screen-cap mereka. Ini sangat disayangkan soanye kehadiran singkat mereka bener-bener sukses nyolong perhatian. Pemimpinnye juga punya one-liner yg, saat ini, udah ngelegenda di kalangan staff HHD.

Meski lagi-lagi bakal ngomong kalo gue ngga ngerasa punya ikatan nasionalisme ama film ini, harus diakuin kalo konten lokalnye emang, jujur, ngasih hiburan tersendiri. Lucu gimane butuh seorang sutradara Wales buat bikin film Indonesia yg orang-orang di dalemnye emang keliatan kaya orang Indonesia. Fesyen paling populer di rumah susun tersebut keliatannye kaos oblong, celana ngatung, ama sendal jepit, yg adalah fesyen paling populer di semua tempat tinggal manepun selaen setting sinetron Multivision. Poin plus laennye adalah keputusan Gareth Evans buat sama sekali ngga ngelibatin aktor ganteng di sini, nah, sebelon para anggota cast rame-rame ngegebukin gue sampe jadi bubur, ijinin gue ngejelasin kalo itu bukan berarti semua yg maen The Raid tu buruk rupa. Ngga. Gue cuman gembira aje ngeliat film nasional yg ngga punya keterlibatan aktor-ganteng-indo-ngga-bisa-bahasa-Indonesia-lebih-dari-2-kata-itupun-pake-logat-Inggris di dalemnye. Udah selayaknye kalo film eksyen tuh dibintangin ama bintang film eksyen, bukan model sampul majalah remaja ape finalis lomba bakat yg sama sekali ngga ada hubungannye ama eksyen. Seorang bintang eksyen ngabisin keseluruhan durasi film yg die bintangin buat nabrak kaca, ditonjokin, ditembakin, ama secara keseluruhan, berusaha dibunuh ama orang-orang. Makanye wajar kalo makin lama film itu berarti mukenye bakalan keliatan semakin mengerikan. Ini persis kaya evolusi keidupan lo pada satu malem minggu.

Gue bukan tipe-tipe orang yg suka ngasih tau mane film yg harus lo tonton ama mane yg ngga, cuman kalo misalnye lo punya waktu luang diantara kesibukan lo ngonstruk Psylon ape apapun, maka makenye buat nonton The Raid Januari nanti ngga akan bikin lo nyesel. Misalnye lo ngekspektasiin ini sebagai film tonjok-tonjokan brutal (dan trailernye sebenernye ngga ngasih opsi ekspektasi apepun selaen itu), maka The Raid bakalan nonjok idung lo pake aksi-aksi hardcore martial-art nan fantastis. Kaya gimane Hot Fuzz nunjukin Michael Bay kalo sekuen eksyen over-the-top tuh bisa jadi lucu secara disengaja, The Raid nunjukin kalo film eksyen tradisional bisa ngumbar kekerasan-grafik nan vulgar tanpa perlu keliatan eksploitatif. Saat ini, kite semua tau kalo Screen Gems udah ngebeli hak buat nge-remake judul ini, jadi beberapa taun lagi gue bakalan bisa ngejelek-jelekin film Hollywood karena udah ngerusak source-material yg diproduksinye di negara asal gue. Hei, itu bisa dianggep sebagai privilege tersendiri! Kayanye gue bakal nikmatin itu. Sementara, kalo ngeliat poster film ini di daftar “now playing” bioskop terdekat, gue rekomendasiin lo buat beli tiket, tinggalin kemanusiaan lo di depan pintu teater, terus alemin sendiri salah satu film eksyen terbaik yg ada saat ini. Bukan cuman di Indonesia, tapi di manepun.

Oiye, ama jangan lupa: “bersenang-senang!”

.

.