His Hero is Demon

Making Horror A Cheesy Catchphrase Since…Just Now

INAFFF’11; IMMORTALS: AN INTELLECTUAL OVERVIEW

2 Comments

Ternyata, 300 tanpa Sparta tetep aje dipenuhin pedang, sendal, ama orang-orang yg punya obsesi kronis pada binaraga.

.

Sebelonnye, mari kite mulai dengan sebuah balada.

Beberapa hari menjelang INAFFF 2011 dibuka, sebuah tragedi melanda staff HHD. Gue ngga akan ngebahasnye secara mendetil soalnye itu sedikit memalukan, tapi intinye kite keilangan semua tiket pre-sale yg udah kite beli. Dan dikarenakan kite terlalu melarat buat beli tiket yg sama 2 kali, hal ini berarti gue nyaris bakalan kelewatan INAFFF taun ini. Gue bilang “nyaris” berhubung ternyata pihak panitia ngasih invitation film opening/closing, ini nyelametin muke gue untuk bisa tetep nge-review film INAFFF & ngga dianggep culun ama orang-orang yg punya anggepan kalo ngga nonton INAFFF berarti gue tu culun (bos gue).

Taun ini, film openingnye dibikin ama Tarsem Singh & judulnye Immortals. Jujur aje, Immortals bukan salah satu film yg karcisnye kite beli (trus ilang). Biarpun hype-nye gede, dari dulu gue selalu nyangka ini tuh spinoff-nye 300 & berhubung kaga pernah suka 300, gue pikir mendingan make duit buat beli tiket film-film yg lebih menarik kaya Super ama Hobo with a Shotgun. Lagian, gue juga bukan penggemar sutradaranye, gue nonton The Cell & sekarang udah lupa itu film apaan. Gue juga nonton The Fall & sekarang juga udah lupa itu film apaan, cuman, karena menolak undangan tuh sama sekali ngga sopan (juga soalnye ini adalah 1 dari total 2 film yg bisa gue tonton taun ini), maka penulis anda sekalian ini pun berangkat dari Bandung buat duduk di korsi audi 2 Grand Indonesia tanggal 11-11-11 kemaren. Ngarepin bisa nikmatin –minimal- kekerasan grafik yg eksplisit buat terjadi di layar.

.

Dibuka dengan sebuah narasi panjang -sebuah cara yg lazim dipake film kalo yg bikin ngga punya cukup budget buat bikin trilogi untuk nge-recap asal muasal ceritanye- soal -alkisah- pada jaman dahulu kala, sebelon manusia ama dinosaurus idup di bumi, tersebutlah sebuah ras tertentu yg disebut sebagai “immortals”. Buat alesan yg gagal gue inget, para immortals ini mutusin buat saling ngebunuh dalem sebuah perang Mahabharata di khayangan yg berakhir dengan para pemenang jadi “dewa” di Olympus. Sementara para Titans yg kalah dikutuk di dalem gunung Tartarus, terperangkap buat idup di dalem sebuah meja foosball untuk selama-lamanye.

Sambil dimaenin ama mahasiswa-mahasiswa mabok

Longkap ke sekian ratus taun kemudian, waktu Hyperion (Mickey Rourke), raja dari Maggots Kingdom di mane pake topeng adalah sesuatu nan wajib, mimpin pasukannye buat nguasain seluruh Yunani, yg keliatannye 100% terdiri dari tebing-tebing curam, dalem rangka nyari satu mestika dewata kuno yg disebut sebagai “busur Epirus”. Kaya benda-benda laen yg jatoh dari langit, busur Epirus ini punya kemampuan sakti-mandraguna buat ngebongkar meja foosball Tartarus & ngelepasin para Titans. Hyperion pengen ngelakuin ini soalnye die kecewa ama para dewa yg ngga ngapa-ngapain pas keluarganye abis gara-gara…sesuatu yg gue ngga inget & die pengen balas dendam. Oiye, die juga pengen nguasain dunia ape semacemnye soalnye die itu jahat, lalim, bengis, serta diperanin ama Mickey Rourke. Sejujurnye, gue ngga ngerti kenape Hyperion punya pikiran kalo makhluk-makhluk superior dengan kemampuan ngebunuh dewa kaya Titans bakalan sudi ngebantuin manusia biasa kaya Hyperion untuk mencapai tujuannye. Cuman kaya bisa kite liat dari pemilihan baju zirah yg bikin die keliatan kaya lagi dimakan idup-idup sama Kaiju musuhnye Kamen Rider, Hyperion emang raja yg suka ngambil keputusan-keputusan buruk. Salah satunye dengan ngegorok leher ibunda dari Theseus (Henry Cavill), seorang pemuda kampung yg kebetulan dipilih langsung ama Zeus buat di-photoshop torsonye pake action-figure Rambo.

Semacem gini, cuman sambil bawa pedang & ngga ngelibatin glitter

Secara alami Theseus pengen bales dendam, jadi die ngebunuh Minotaur dalem labirin kaya ape yg ketulis dalem legenda mitologi Yunani soal Theseus. Ups, ternyata ngga. Die malah ikut nyariin busur ajaib sambil flirting ama Oracle (Freida Pinto), satu yg punya kemampuan magis menerawang busur itu ada dimane. Anehnye, ujung-ujungnye busur itu ditemuin dengan ngga sengaja tanpa keterlibatan doski di dalemnye, jadi sebenernye fungsinye apaan? Oiye, bener, ngasih kite parsialnudity. Sebelonnye, Isabel Lucas ngelakuin hal yg sama dengan lebih frontal, sayangnye pas itu die keliatan kaya Rebecca Romijn di X-Men, jadi mereka-mereka yg ngga dapet boner pas nonton Avatar ngga akan bisa terlalu nikmatinnye. Ngomongin Isabel Lucas, di sini doski dapet peran jadi Athena yg –bareng sodara-sodara dewatanye- suka nongkrong di ujung tebing (Tarsem Singh kayanye suka banget tebing) Olympus ngeliatin manusia dibunuhin. Alesannye adalah soalnye, sebagai dewa, mereka ngga diijinin buat ikut campur dalem urusan manusia sebab ini bertentangan ama kode etik dewa yg diciptain ama…um, dewa, alias mereka sendiri. Gue asumsiin soalnye mereka tuh pada dasarnye pemales luar biasa & ngga pengen ngapa-ngapain seharian selaen duduk-duduk di tebing pake kostum-kostum yg, gue curiga, cuman bisa ditolerir ama sesama penghuni Olympus doang.

Setiap hari adalah mardi gras kalo lo tinggal di Gunung Olympus

Sementara itu, Theseus bareng seseorang yg diperanin Stephen Dorff plus si Oracle yg baru aje die bikin jadi bukan Oracle lagi (orang cuman bisa jadi Oracle kalo doi tuh perawan) mulai terlibat petualangan Clash of the Titans-esque buat nyari busur Epirus. Sebelonnye, Poseidon kudu ngasih kesempatan mereka melarikan diri dengan ngelakuin elbow drop Macho Man Randy Savage dari puncak Olympus ke tengah samudera, memulai tsunami & ngebunuh semua orang yg ada di Yunani soalnye mereka pada tinggal di tebing ngadep ke laut. Itu mungkin pelanggaran terhadap kode etik kedewataan, tapi Poseidon bisa dengan gampang ngasih alibi kalo die kepeleset pas lagi nongkrong. Abis itu, Theseus nemuin busur ajaib yg dicari semua orang dengan cara nan (sedikit) konyol & ngilanginnye pake cara nan (luar biasa) konyol. Berhubung Hyperion udah berhasil ngedapetin mestika idamannye, die berenti ngebunuh bawahannye tanpa alesan kaya penjahat tipikal di film James Bond terus ngebawa pasukannye ke gunung Tartarus. Inget kalo para Titans dikurung di sono, jadi para protagonis kite kudu buru-buru kesana sebelon Hyperion tiba. Ini dimungkinkan soalnye mereka dikasih kuda yg bakalan terus lari sampe jantungnye berenti semacem kaya atlet-atlet marathon Kenya. Seperti bisa diduga, ini bermuara pada sebuah remake pertempuran dari 300 & waktu keadaan udah ada di luar kontrol protagonis kite, para dewa Olympians terpaksa ngirim satu-satunye kekuatan terakhir yg punya kemampuan nyelametin umat manusia dari ancaman para Titans:

The Mighty Morphin Power Rangers!! Deluxe edition.

Udah. Cerita Immortals emang cuman gitu doang. Ngebosenin & dieksekusi secara lebih medioker dari cutscene di God of War yg selalu lo skip pas lagi maen. Ngebuktiin kalo langkah Tarsem Singh buat nulis ulang legenda Theseus merupakan manuver yg buruk. Di antara fakta-fakta menarik dari mitos Theseus tuh dongeng kalo die adalah penemu gulat ama potongan mullet, yg die ciptain supaya rambut depannye ngga bisa dijambak musuh. Buat gue pribadi, keputusan Tarsem Singh buat sama sekali ngehirauin status Theseus sebagai nenek-moyang Hulkamania & ngegantinye jadi sebuah episode Xena: Warrior Princess dalem budget Titanik adalah sesuatu yg sangat mengecewakan. Ok, mungkin gue minoritas dalem soal itu berhubung gue tuh wrestling-nerd, tapi gimane dengan Minotaur-nye? Ayolah, itu pengetahuan paling umum dari legenda Theseus. Kite semua tau Minotaur itu makhluk setengah banteng-setengah orang. Itu bentuk monster mitologis yg suka dikarang orang-orang Yunani kuno guna ngejustifikasiin selera beastiality mereka. Toh, Tarsem Singh punya ide brilian untuk ngegambarinnye sebagai Kane pake topeng banteng dari kawat berduri. Ini tolol soalnye yg namanye Minotaur tuh udah sempurna sebagai Minotaur, itu udah ikonik sekaligus mistis pada waktu bersamaan. Kenape malah ngerusak semua mistisismenye dengan bikin die keliatan kaya kostum panggung personel band metal kacangan?

Kalopun ini sebenernye foto orang stage-diving di konser GWAR, kite ngga akan bisa tau bedanye

Selaen bikin Minotaur buruk ama sebuah “labirin” dengan layout paling ngga niat yg pernah gue liat seumur idup, sutradara Tarsem Singh juga bikin kite bingung dengan penggambaran dewa-dewa Yunani yg sama sekali ngga mirip ama semua deskripsi dewa Yunani yg kite tau. Asli, nonton ini gue ngga tau mane yg Thor, mane yg Hades, mane yg Ares dst,dst, semuanye kaga ada yg familiar. Para dewa di film ini lebih keliatan kaya penari latar di tur dunia Born This Way daripade anggota keluarga besar pantheon Yunani kuno. Ngga satupun bahkan punya jenggot & kite semua tau kalo yg namanye dewa Yunani, ama guru besar perguruan kung-fu, selalu punya jenggot. Itu udah harga mati, sama kaya kaos Misfits di konser Danzig. Sebagai bonus dari visualisasi non-akurat akan segalanye, Singh juga punya kebiasaan buat –secara ngga sengaja- nyabotase filmnye pake adegan-adegan yg ironis buat tujuan awalnye sendiri. Contohnye, pada salah satu adegan, Zeus (Luke Evans) ngehukum Apollo gara-gara nyampurin urusan manusia dengan cara ngehantemnye sampe nembus gunung ape semacemnye. Adegan ini dibangun sebagai momen buat nunjukin betapa berdedikasinye Zeus dalem soal ngebiarin manusia merjuangin takdirnye sendiri tanpa perlu digembala sama para dewa. Ini jelas dimaksudin sebagai adegan emosional nan pivotal bagi film keseluruhan (die bahkan diliatin nangis sebelon ngelakuinnye) & itu sebenernye nyaris efektif, sebelon gue ketawa pas ngeliat gunungnye ninggalin lobang dalem bentuk siluet sempurna Apollo kaya die tuh karakter Looney Tunes.

Tergambar di atas: kematian tragis Apollo

Adegan laen nunjukin Hyperion, dalem pidato panjang soal keabadian, merintahin Minotaur buat ngehantem genital orang pake palu godam raksasa. Nah, dalem konteks film ini, itu diniatin sebagai penggambaran dari betapa jahatnye Hyperion, gimane die bisa ngebunuh ama nyiksa sapepun yg die pengen, termasuk anak buahnye sendiri seenak jidat. Cuman visualisasi dari seseorang dalem topeng sapi mukul genital orang pake sesuatu yg lebih pantes dipegang Harley Quinn tuh terlalu slaptick buat bisa nakutin sapepun. Mustahil punya reaksi selaen ketawa ngeliat sesuatu yg lebih cocok dilakuin orang di sebuah skit Jackass. Meski gitu, ngga segalanye dari film ini tuh menggelikan kok. Adegan pertempurannye, walopun keliatan kaya kloning 300, dieksekusi dengan apik. Para penggemar eksyen generasi modern bakal nikmatin semua pertempuran “epik” side-scroll nan terkomputerisasi di sini  dengan darah slow motion-CG muncrat kesana-kemari. Versi lebih fenomenal dari kung-fu manipulasi teknologi ini terjadi waktu Team Olympia ngadepin Team Titan di dalem Tartarus, pas mereka saling ngebunuh satu sama laen pake manuver-manuver akrobatis yg impresif. Bahkan meski itu ngga keliatan lebih dari sebuah seri Street Fighter canggih buat PS6, eksyennye gue akuin cukup ngehibur. Bikin gue berharap megang controller buat ape yg lagi terjadi di layar, makenye buat maen Versus Mode & ngetawain temen pas gue ngembombardir die pake paha massifnye Chun Li.

10. HITS. COMBO. SUCKAAA!!!

Kalo diminus ama adegan aksi di babak terakhirnye itu, maka Tarsem Singh ngga ngasih ape-ape lagi buat kite yg nonton Immortals.Ceritanye standar, diperburuk ama karakter-karakternye yg serba hambar; Henry Cavill jadi pahlawan ngebosenin, Mickey Rourke jadi penjahat stereotip, Stephen Dorff jadi orang yg ngga tau gimane caranye pake baju, dan Freida Pinto jadi Olive Oil. Theseus sama sekali ngga lebih dari karakter “chosen one” baru, satu yg rada sucks sebagai chosen one soalnye die ngga bisa ngelakuin apepun dengan bener kalo ngga dibantuin ama para dewa. Kenape Zeus malah milih die? Kenape ngga milih Conan? Conan jauh lebih sukses sebagai jagoan daripade Theseus di sini. Serius, Immortals bener-bener butuh Conan. Abis lewat sejam, nontonnye jadi kerasa kaya naek kereta antar-kota waktu lo malah ngabisin waktu ngeliatin pemandangan (lagi-lagi CGI) soalnye ngga ada hal menarik yg dilakuin ama orang-orang di layar. Mungkin gue juga salah baru nge-review ini sekarang, kayanye banyak hal di dalemnye yg gue udah lupa, tapi gue yakin itu ngga bakalan penting-penting amat. Selaen sebuah momen menarik nunjukin para Oracle terlibat dalem pesta-piyama, Tarsem Singh terlalu patuh nurutin formula film-film “kolosal” gini sampe urutan kejadian di dalemnye jadi sama ketebaknye ama apaan yg bakalan dilakuin orang-orang pada foto di bawah ini pake photoshop.

Jadi misalnye lo pengen nonton Immortals, gue anjurin mending liat DVD-nye aje & skip langsung ke 2 chapter terakhir. Lo ngga akan kelewatan ape-ape selaen sejumlah visualisasi lanskap dengan efek visual terkini doang. Kecuali emang itu yg lo cari dari sebuah film ye? Itu laen cerita. Kalo buat orang macem gue yg bahkan ngga ngerti “android” tuh sebenernye apaan, gituan jelas bukan jenis-jenis “eye-candy” gue. Gue lebih milih boobs, cleavage, ama kekerasan-vulgar. Kekerasan-vulgar beneran, bukan hasil karya digital. Beberapa taun lalu, gue sempet nulis review soal betape bodohnye bikin darah secara CG, sekarang itu kayanye udah jadi standar sinema laga modern. Ok, mungkin gue emang udah mulai tua, tapi gue tetep ngerasa kalo itu dungu. Tapi, bahkan dengan semua pencapaian digitalnye di sini, suatu hari nanti pas teknologi udah memungkinkan kite buat berhubungan intim secara CG, anak-anak masa depan bakalan ngetawain Immortals sama kaya gimane kite sekarang ngetawain Marked for Death ama Double Impact: sebagai film laga idiotik masa lalu yg diputer berulang-ulang di bioskop Trans TV.

.

Talak udah dijatohin, sampe ketemu 3 hari lagi di The Raid! Gue bakal berusaha ngga telat-telat amat ngereview-nye nanti.

.

.

Advertisements

2 thoughts on “INAFFF’11; IMMORTALS: AN INTELLECTUAL OVERVIEW

  1. Jujur, film ini gak masuk dalam daftar list-ku dengan berbagai alasan:

    1. Ada mitologi Yunani. I dont like it, sorry for the fans. Alasannya ya karena para dewa2 itu. Dewa kok kelakukuannya nggak banget. Sampe2 saya curiga mereka itu aslinya manusia yg punya kekuatan super lalu ngaku-ngaku dewa, sama kayak villain dari superhero *apa hubungannya ya?*

    2. Tipikal choosen one suck.

    3. Pakaian perang mereka yg super norak dan rada… gay.

    “The Mighty Morphin Power Rangers!! Deluxe edition.”
    Pffft….! Buhawahahah, bener juga. 4 cowok, 1 cewek.

    Dan membaca review ini jauuuuh lebih menyenangkan. Ditunggu review The Raid.

    Like